Heb 5 | BDD | STEP | Topwaoliyao madoudi Yehoba 'ihesinuwediya ta 'ilagudiya, ma tauna matana sipwaopwaoli tomota 'idi mumuga galadi weyahidi.

Hebrews 5

1 Topwaoliyao madoudi Yehoba 'ihesinuwediya ta 'ilagudiya, ma tauna matana sipwaopwaoli tomota 'idi mumuga galadi weyahidi. 2 Topwaoliyedi 'idi mumuga nuhana tomata'u'upao ma topuiyao 'oidiya, weyahina topwaoliyedi tomota tuwa, ma'idi we'a. 3 Coinega taudi 'idi puiyao weyahidi ta wete tomota baibaiwadi 'idi puiyao weyahidi sipwaopwaoli Yehoba 'oina.

4 Geya sawasawahina ma 'aigeda taiya tauna 'ina nuwatuhuwega 'ihetopwaoli, ta Yehoba hesi 'ina hesinuwega, gide mwalo Yehoba Eloni* 'ihesinuweya ta 'ihetopwaoli. 5 Wete gide Keliso geya taunamo 'ida 'abilagasiya ma 'ihetopwaoli, ta Yehoba 'ihesinuweya ta 'ihegwaeya, 'igwae,

“Cowa natugu. Nige bo'i ya'ahwa natunegowa.”
6 Ta wete 'ina gwae heluwena, 'igwaeya,

“Cowa 'uhetopwaoli hataya gide Melikisedeki*.”
7 Mwalo Yesu bale'uwa 'imiyamiya ma'ina dou 'i'ahwa 'ahwanoiya Tamana 'oina, ta nuwanuwana 'amasega 'i'abihete, 'oinega 'i'abiheteya weyahina Yesu Tamana 'ihe'asisiyeya. 8 Yesuina Yehoba Natuna, ta hesi tuwa muyamuya 'ilobeya ta 'ina 'alama'i'itega 'ihematamatana moisa, 9 ta 'oinega 'ina mumuga mabwaiyana dumwaluna. Tauda wete 'eguma tahematamatane 'abihetena hataya Yesuina 'oinega taloba, 10 weyahina Yehoba Yesu 'ihesinuweya ma 'ihetopwaoli hataya gide Melikisedeki.

Sahena Yehoba talologwahate

11 Nuwatuhu bewa weyahina gwae baibaiwana simiyamiya, nuwanuwagu ma yahepwailedi 'oimiya, ta geya sawasawahina, weyahina tenami tuituidi. 12 Tuta bewa 'ilobwainegomiya ma hali tomota 'oidiya wahe'ita, ta geya sawasawahimi, weyahina Yehoba wasana huhuna geya wasanapu, 'oinega 'abwa 'ahehe'itegomi. Comi susumo 'ilobwainegomiya weyahina 'e'ahai pa'alina geya 'ilobwainegomi. 13 Coinega 'omi gide gwagwama, 'eda dumwadumwaluna geya nuwami 'isabwalena moisa, eeta 'ilobwainegomiya ma he'ita nuhana 'oinega 'ahe'aigomi nugeta.

14 Ta 'eguma taiyawedi 'idi sanapu 'imatuwa, taudi gide 'e'ahai pa'alina 'ana to'aiyao, weyahina nuwadi 'isabwalena pwaiya, ta sawasawahidi sihesinuwa to'aha 'ausalana ma to'aha galana.